बैशाख १० सिरहा सिरहा मादक पदार्थ सेवन(मापसे) गरेर सवारी चलाएको आरोपमा एक जना एम्बुलेन्स चालक पक्राउ परेका छन् । स १ च ६९१ नम्बरको एम्बुलेन्स चालक लहान नगरपालिका–१ का ३२ वर्षीय दिनेश कुमार दास पक्राउ परेका हुन् ।

उनलाई मादक पदार्थ सेवन गरी एम्बुलेन्स चलाएको आरोपमा पक्राउ गरी सार्वजनिक अपराध अन्तर्गतको अभद्र व्यवहारको कसुरमा मुद्दा दर्ता गरिएको जिल्ला प्रहरी प्रवक्ता डिएसपी मुक्ति नाथ सापकोटाले जानकारी दिए ।

सुर्य ज्योति बिकास समाजको नाम रहेको एम्बुलेन्स चालकलाई चेक गर्दा मादक पदार्थ सेवन गरेको पुष्टि भएपछि चालक र एम्बुलेन्सलाई नियन्त्रणमा लिएको बताउँदै, डिएसपी सापकोटाले भने पछिल्लो समय मादक पदार्थ सेवन गरेर एम्बुलेन्स चलाउँदा दुर्घटना बढ्न थालेपछि बिरामी नबोकेको अवस्थामा उनीहरुलाई पनि परीक्षण गर्न थालेका छौं ।

उन्ले भने एम्बुलेन्स जस्तो संवेदनशील सेवा प्रवाह गर्ने चालक नै मापसे र लापसे गरेपछि कसरी बिरामीलाई सम्बन्धित ठाउँमा पु¥याउनु र उपचार गर्नु। पछिल्लो समय मापसे र लापसे प्रयोग बढी हुँदै आएको भेटिएको छ। बिरामी बोकेको समय बाहेक अन्य समयमा पनि एम्बुलेन्स चालकलाई चेक गर्न थालेका छौं ।

कुनै एम्बुलेन्स चालकले मापसे वा लापसे गरेको थाहा पाए प्रहरीलाई खबर गर्न आग्रह गर्दै डिएसपी सापकोटाले भने एम्बुलेन्स एउटा संवेदनशील वाहन हो। कसैको ज्यान बचाउनका लागि चाँडोभन्दा चाँडो अस्पताल सहज रुपमा पु¥याउनु पर्ने हुन्छ । तर, उनीहरु मापसे र लापसे गरेर सवारी चलाउँदा गाडीभित्र र बाहिरका मानिसहरु उच्च जोखिममा हुन्छन् ।

यस आर्थिक वर्षको हालसम्म मापसे लगायत विभिन्न शीर्षकमा २५ जनाभन्दा बढी एम्बुलेन्स चालकलाई कारबाही गरेको जिल्ला ट्राफिक कार्यालय लहान्ले जनाएको छ ।