प्रहरीले पार्टीको समीक्षा भेलाका निम्ति सुर्खेत पुगेका एमाले उपाध्यक्ष बिष्णु पौडेललाई सम्पत्ति शुद्बिकरण बिभागको पत्रका आधारमा पक्राउ गरेको छ ।

सुर्खेतमा आयोजित कार्यक्रममा सहभागी पौडेललाई पक्रेर काठमाडौं ल्याउन लागिएको छ । सेयर कारोबार र सम्पत्तिसहित बालुवाटारको ललिता निवास जग्गा प्रकरणबारे अनुसन्धानको क्रममा नियन्त्रणमा लिइएको सरकारी दावी छ ।

यसबीच सरकारले २०६३ देखि यताका पूर्व कर्मचारी,राजनीतिज्ञलगायतको सम्पत्ति छानबिनका निम्ति आयोग गठन गरेको छ । आयोगले सम्पत्ति विवरण बुझाउन जेठ मसान्तसम्म दिएको म्याद पुनः एक महिना थपेको अवस्थामा सम्पत्ति शुद्धिकरण अनुसन्धान विभागले पौडेललाई नियन्त्रणमा लिएको हो ।

पार्टी पुनर्गठन अभियानमा जुटेका पौडेलमाथि छोराका नाममा ललितानिवासको ८ आना जग्गा लिएर सरकारलाई फर्काएको केस उल्टाउन लागिएको बुझिएको छ ।

पौडेल पक्राउ परेलगत्तै सम्पत्ति शुद्धीकरण विभागको टोलीले उनको ललितपुरको भैँसेपाटीस्थित निवासमा समेत छापा मारेको छ । पौडेललाई रात्रि बसमा चढाएर काठमाडौं ल्याउन लागिएको छ ।

आज बिहान पौने १२ बजेदेखि सुर्खेत जिल्ला वीरेन्द्रनगर नगरपालिका वडा नम्बर ३ एरीचोकमा रहेको शुभ होटलमा  एमाले निर्वाचन समीक्षा तथा पार्टी पुनर्गठनसम्बन्धी सुझाव संकलन कार्यक्रम चल्दाचल्दै एसपी ठाकुरप्रसाद  पौडेलको कमाण्डमा ९ जनाको टोलीले पौडेललाई सम्पत्ति शुध्दिकरण मुद्दामा पक्राउ गरेको हो ।

स्रोतका अनुसार हाल सम्पत्ति शुद्धिकरण,बिमा,धितोपत्र र बैंकिङ कसुरसम्बन्धी मुद्दामा पुर्पक्षका लागि जेल चलान भएका विवादास्पद व्यवसायी दीपक भट्टसँगको सम्बन्धमा पनि पौडेलमाथि अनुसन्धान हुने सम्भावना छ । यसअघिका अन्य अर्थमन्त्री पनि सम्पत्ति शुद्धिकरणको राडारमा रहेको आशंका छ ।