सिरहा, १९ बैशाख । भारतको पहलगाममा भएको जघन्य आतंकवादी हमलामा नेपाली युवा सुदीप नेयौपानेको मृत्यु भएपछि सिरहाको गोलबजारमा बिरोध प्रदर्शन गरिएको छ।

पाकिस्तानप्रति विरोधको स्वर उचाल्दै धर्मराज हिन्दु सेनाले प्रदर्शन आयोजना गरेपछि गोलबजार तनावपूर्ण बनेको थियो।

बुधबार आयोजित विरोध प्रदर्शनमा ५०० भन्दा धेरै स्थानीयको उपस्थिति रहेको थियो। प्रदर्शनको अगुवाइ कृष्ण गुंरागाईं (हनि सिंह) ले गर्दै पाकिस्तानी सेना प्रमुख असीम मुनिरको पुतला जलाएर आक्रोश पोखेका थिए ।

आतंकको आडमा मित्रता स्वीकार्य छैन,’ भन्दै प्रदर्शनकारीहरूले पाकिस्तानी विरोधी नारासमेत लगाएका थिए।

प्रदर्शनमा अर्को विवादास्पद एजेन्डाको पनि बिरोध भएको छ। नेकपा एमालेबाट निर्वाचित गोलबजार नगरपालिकाका मेयर श्याम श्रेष्ठले अघि सारेको ‘नेपाल–पाकिस्तान मित्रता पार्क’ निर्माण योजनाको पनि उनीहरूले बिरोध गरेका छन।

स्थानीयवासीहरूले यस्तो योजना राष्ट्रहितविपरीत भएको भन्दै तत्काल खारेज गर्न माग गरेका छन्। प्रदर्शनकारीहरूको भनाइ थियो, “जहाँ पाकिस्तानबाट आतंक फैलिन्छ, त्यहाँ मित्रता होइन, प्रतिकार चाहिन्छ।”

पहलगाममा पाकिस्तानीको संलग्नतामा भएको हमलामा २८ जना निर्दोष पर्यटकको ज्यान बताउँदै आइएको छ । तीमध्ये बुटवलका सुदीप न्यौपाने नामक नेपाली युवाको मृत्युले देशभरि समवेदना र आक्रोशको लहर उठाइरहेको बेला यो प्रदर्शन भएको हो ।