सिरहा सिरहाको औरहीमा महायज्ञ लगाउने स्थानबाट अछुतको फत्तुर थापेर डोजर लगाएर दलित दीपक मरिकको घर भत्काएका कारण पक्राउ परेका औरही गाउँ पालिका अध्यक्ष शिवजी यादवलाई बचाउने खेल प्रारम्भ भएको छ ।

जिल्ला प्रहरी कार्यालय भित्र पञ्चयती ( सामाजिक छलफल ) गरी मिलापत्र गराउन प्रहरी उपरीक्षक रमेश पण्डितले वातावरण बनाउन थालेका छन् । जाहेरी दरखास्त लिएर दर्ता गराउन जिल्ला प्रहरी कार्यालय सिरहा पुगेका मरिकलाई सामाजिक छलफलमा अल्मल्याइएको छ । जिल्ला प्रहरी कार्यालय भित्र विभिन्न राजनीतिक दलसँग सम्बन्धित दलित अगुवाहरुलाई बोलाएर गाउँ घरको घटना

हो मिल्नु मिलाउनु पर्छ भनेर पैरवी गरिन थालिएको छ । पञ्चायतीमा पत्रकारहरुलाई भने प्रवेश गर्न रोक लगाइएको छ । पत्रकार राहुल रायलाई गेटमै रोकियो ।

बिहान १० बजे जाहेरी दर्ता गर्न जिल्ला प्रहरी कार्यालय सिरहा पुगेका दीपक मरिकको जाहेरी दिउसो १ बजेसम्म दर्ता भएको छैन । उनलाई पञ्चायतीमा भुलाएर सम्झाइ बुझाइ गर्ने प्रयास भइरहेको छ । ललाई फकाई गरी जाहेरी मै मुद्दा हल्का गराउने वा सर्वपक्षीय सहमतिको नाममा एउटा कागज खडा गरी मुद्दा दर्ता नगर्ने प्रपञ्च रचिएको छ । यस कार्यमा सिरहाका एसपी रमेश पण्डित दिलोज्यान दिएर लागेका छन् ।

सांसदहरु , मिडिया र दलित आन्दोलनको दबाबाका कारण प्रहरीले हिजो शुक्रवार अपरान्ह पालिका अध्यक्ष यादव र पूर्व वडाध्यक्ष दिलीप यादवलाई जिल्ला प्रहरी कार्यालय सिरहाले पक्राउ गरेको थियो ।

दलितको घर भत्काउने आरोपीहरु पक्राउ परेपछि आज पीडित दीपक मरिक जाहेरी दरखास्त लिएर दर्ता गराउन जिल्ला प्रहरी कार्यालय सिरहा पुगेका थिए ।

दलित आयोगका पूर्व सदस्य कवुली पासवानले छुवाछुतको अपराधमा मिलापत्र हुँदैन । रिंकु सदाको बलात्कार घटनामा पञ्चायती गरे जस्तो गर्नु हुँदैन भनेर अडान लिएका छन् । तर एसपी पण्डितले आनाकानी गरेर घटनालाई दवाउने अनेक जुक्ती गरिरहेको एक दलित अगुवाले बताए ।