गोलबजार । लामो समयदेखि कम्युनिस्ट राजनीतिमा सक्रिय रहँदै आएका रामचन्द्र महतोको राजनीतिक योगदानको उचित मूल्यांकन नेपाल कम्युनिस्ट पार्टी (नेकपा) ले नगरेको भन्दै पार्टीभित्रै प्रश्न उठ्न थालेको छ।

आगामी २०८४ सालको स्थानीय तह निर्वाचनलाई लक्षित गर्दै गोलबजार नगरपालिकाको नगरप्रमुख पदका लागि विभिन्न नेताहरूले आन्तरिक तयारी र लबिङ सुरु गरे पनि महतोको नाम भने चर्चामा आउन सकेको छैन।

विद्यार्थी जीवनदेखि नै कम्युनिस्ट राजनीतिमा सक्रिय महतो २०७९ सालको स्थानीय तह निर्वाचनताका तत्कालीन नेकपा माओवादीबाट गोलबजार नगरपालिकाको नगरप्रमुख पदको उम्मेदवार बन्ने आकांक्षी थिए। तर, पार्टीले उनलाई टिकट नदिएर देवनाथ साहलाई उम्मेदवार बनाएको थियो।

त्यसपछि २०७४ सालको स्थानीय तह निर्वाचनमा पनि महतोलाई नगरप्रमुखको टिकट दिने आश्वासन पार्टीका शीर्ष नेताहरूबाट प्राप्त भएको बताइन्छ। तर, उक्त निर्वाचनमा पनि पार्टीले देवनाथ साहलाई नै उम्मेदवार बनायो। दुई पटकसम्म अवसरको अपेक्षा गरेका महतो पार्टीको निर्णयका कारण उम्मेदवार बन्नबाट वञ्चित भए।

महतो तत्कालीन चन्द्रलालपुर गाउँ विकास समितिमा दुई कार्यकाल उपाध्यक्षमा निर्वाचित भइसकेका अनुभवी जनप्रतिनिधि पनि हुन्। लामो समयदेखि पार्टी संगठनमा क्रियाशील रहनुका साथै केन्द्रीय सदस्यसमेत रहेका उनको राजनीतिक योगदान र अनुभवका आधारमा आगामी निर्वाचनमा पार्टीले उचित जिम्मेवारी दिने अपेक्षा उनका समर्थकहरूले गरेका छन्।

तर, आगामी २०८४ सालको निर्वाचन नजिकिँदै गर्दा पनि महतोको सम्भावित उम्मेदवारीबारे पार्टीभित्र खासै चर्चा सुनिएको छैन। बरु गोलबजार नगरपालिका–३ निवासी तथा गैरसरकारी संस्था सञ्चालन गर्दै आएका कुमार लामाले नगरप्रमुखको टिकट प्राप्त गर्न सक्रियता बढाएको देखिन्छ।

पार्टीका जिल्ला तहका केही नेताहरूले समेत लामाको पक्षमा केन्द्रसम्म लबिङ गरिरहेको चर्चा छ। यसले लामो समयदेखि पार्टीमा योगदान पुर्‍याएका महतोको राजनीतिक भविष्य र पार्टीभित्र उनको स्थानबारे नयाँ बहस सिर्जना गरेको छ।

पार्टीमा लामो समय योगदान दिएका, दुई कार्यकाल स्थानीय तहमा जनप्रतिनिधिका रूपमा काम गरिसकेका र केन्द्रीय तहसम्म जिम्मेवारी सम्हालेका महतोको योगदानको मूल्यांकन आगामी निर्वाचनमा कसरी हुन्छ भन्ने चासो बढेको छ।

गोलबजारको राजनीतिक वृत्तमा अहिले यही प्रश्न चर्चाको विषय बन्न थालेको छ।अन्ततः पार्टीको उम्मेदवार छनोटमा कसले अवसर पाउँछ भन्ने कुरा नेतृत्वको निर्णय, पार्टीको आन्तरिक प्रक्रिया र जनताको चाहनामा निर्भर रहनेछ। तर, लामो समय पार्टीमा योगदान दिएका नेताहरूको राजनीतिक भविष्यलाई बेवास्ता गरेर नयाँ राजनीतिक समीकरणलाई मात्रै प्राथमिकता दिइयो भने त्यसले पार्टीभित्र असन्तुष्टि बढाउन सक्ने सम्भावनालाई पनि नकार्न सकिँदैन।