सिरहा । चालु आर्थिक वर्ष सुरु भएको दुई महिनाभन्दा बढी समय बितिसक्दा पनि सिरहाका १७ स्थानीय तहमध्ये १० वटा स्थानीय तहको बैंक खाता सञ्चालनमा आउन सकेको छैन । आवश्यक कानुनी तथा प्रशासनिक प्रक्रिया पूरा हुन नसक्दा ती स्थानीय तहको नियमित आर्थिक कारोबार प्रभावित भएको छ ।

कोष तथा लेखा नियन्त्रक कार्यालय, सिरहाका अनुसार जिल्लाका १७ स्थानीय तहमध्ये हालसम्म सातवटा स्थानीय तहको मात्र बैंक खाता सञ्चालनमा आएको छ । बाँकी १० स्थानीय तहले भने अझै खाता सञ्चालन गर्न सकेका छैनन् ।
खाता सञ्चालनमा आउन नसकेका स्थानीय तहमा सिरहा, लहान, धनगढीमाई र मिर्चैया नगरपालिका तथा विष्णुपुर, नरहा, अर्नमा, औरही, नवराजपुर र भगवानपुर गाउँपालिका रहेका छन् ।

स्थानीय तहको बैंक खाता सञ्चालनका लागि चालु आर्थिक वर्षको नीति, कार्यक्रम तथा बजेट सम्बन्धित नगरसभा वा गाउँसभाबाट पारित गरी आवश्यक कागजातसहित कोष तथा लेखा नियन्त्रक कार्यालयमा पेस गर्नुपर्ने व्यवस्था छ । त्यसैगरी, पालिका प्रमुखले प्रमुख प्रशासकीय अधिकृतलाई आर्थिक अधिकार प्रत्यायोजन गरेपछि मात्र बैंक खाता सञ्चालन गर्न सकिने कार्यालयले जनाएको छ ।

संघीय तथा प्रदेश सरकारबाट प्राप्त अनुदानलगायत सार्वजनिक स्रोतको रकम खर्च गर्दा समेत प्रचलित कानुन र तोकिएको प्रक्रिया पूरा गर्नुपर्ने हुन्छ । आवश्यक प्रक्रिया पूरा गर्न ढिलाइ हुँदा कतिपय स्थानीय तहको बैंक खाता सञ्चालन हुन नसकेको कार्यालयको भनाइ छ ।

तलबदेखि विकास निर्माणसम्म असर

बैंक खाता सञ्चालनमा नआउँदा सम्बन्धित स्थानीय तहको नियमित आर्थिक कारोबारमा प्रत्यक्ष असर परेको छ । कर्मचारीको तलब तथा भत्ता भुक्तानी, विकास निर्माणका योजना सञ्चालन, विभिन्न सेवा तथा कार्यक्रम कार्यान्वयन र अन्य प्रशासनिक खर्च व्यवस्थापनमा समस्या देखिएको छ ।

आर्थिक वर्ष सुरु भएको लामो समयसम्म खाता सञ्चालन हुन नसक्दा स्वीकृत नीति, कार्यक्रम तथा बजेट कार्यान्वयनमा समेत ढिलाइ हुने अवस्था बनेको छ । यसले स्थानीय तहबाट सञ्चालन हुने विकास निर्माणका कामसँगै नागरिकलाई प्रदान गरिने सेवा प्रवाहसमेत प्रभावित हुन सक्ने देखिएको छ ।

विशेषगरी बजेट कार्यान्वयनको प्रारम्भिक चरणमै आर्थिक कारोबार अवरुद्ध हुँदा योजना सम्झौता, भुक्तानी प्रक्रिया, कार्यक्रम सञ्चालन तथा दैनिक प्रशासनिक काममा समेत कठिनाइ उत्पन्न हुन सक्छ । समयमै प्रक्रिया पूरा नभए चालु आर्थिक वर्षका योजना तथा कार्यक्रम कार्यान्वयनमा थप दबाब पर्ने देखिन्छ ।

सात स्थानीय तहको खाता सञ्चालनमा
कोष तथा लेखा नियन्त्रक कार्यालयका अनुसार हालसम्म सिरहाका सखुवानन्कारकट्टी, बरियारपट्टी र लक्ष्मीपुर पतारी गाउँपालिका तथा कर्जन्हा, कल्याणपुर, सुखीपुर र गोलबजार नगरपालिका को बैंक खाता सञ्चालनमा आइसकेको छ ।

यसरी जिल्लाका १७ स्थानीय तहमध्ये सातवटाले आर्थिक कारोबार सुरु गरिसकेका छन् भने १० स्थानीय तह अझै खाता सञ्चालनको प्रक्रियामै रहेका छन् ।
आर्थिक वर्षको सुरुआती चरणमै बैंक खाता सञ्चालन हुन नसक्दा बजेट कार्यान्वयन र सेवा प्रवाहमा बन्द भएको छ ।