सिरहा । सिरहाको औरहीमा महायज्ञका नाममा दलित परिवारलाई विस्थापित गरेको घटनामा पीडित परिवारले जातीय भेदभावविरुद्ध जाहेरी दर्ता गराएका छन् ।
दलित अगुवासहित पुगेका औरही गाउँपालिका–५ का पीडित दिपक मलिकले जिल्ला प्रहरी कार्यालय, सिरहामा जातिय भेदभाव तथा छुवाछुत सम्बन्धी कसुरमा जाहेरी दर्ता गराएका हुन् ।
पीडित मलिकले दिएको जातीय भेद्भाव तथा छुवाछुतसम्बन्धी कसुरको जाहेरी दर्ता भएको जिल्ला प्रहरी कार्यालय सिरहाले जनाएको छ । पीडितले गाउँपालिका अध्यक्ष शिवजी यादव, पूर्ववडाध्यक्ष दिलिप यादव र बजरंगी बाबालाई प्रतिवादी बनाएर जाहेरी दर्ता गराएका हुन् ।
मुलुकी फौजदारी कार्यविधि संहिता २०७४ को दफा ४ को उपदफा (३) बमोजिम जाहेरी दरखास्त दर्ता भएको औरहीका स्थानीयसमेत रहेका राष्ट्रिय दलित आयोगका पूर्वसदस्य कबुली पासवानले जानकारी दिए ।
उनका अनुसार जाहेरीमा प्रतिवादीहरूले पीडित परिवारमाथि जातीय छुवाछूत गरेको, घर तोडफोड गरी विस्थापन गरेको भन्दै कानुनबमोजिम कारबाही र क्षतिपूर्तिको माग गरेका छन् । पीडित परिवारको जाहेरी प्राप्त भएसँगै कानुनी कारबाही प्रक्रिया अघि बढेको सिरहाका प्रहरी प्रमुख प्रहरी उपरीक्षक रमेश पण्डितले जानकारी दिए ।
महायज्ञ गर्ने भनिएको स्थानमा रहेको दिपकको घर फागुन १० मा अछूत भन्दै बजरंगी बाबाको निर्देशनमा गाउँपालिका अध्यक्ष यादव, पूर्ववडाध्यक्ष दिलीप यादवले डोजर लगाएर भत्काइदिएका थिए ।
घटनामा संलग्न गाउँपालिका अध्यक्ष र पूर्ववडाध्यक्षलाई शुक्रबार साँझमात्रै प्रहरीले पक्राउ गरेको थियो । तर बजरंगी बाबा फरार रहेको र उनको खोजी भइरहेको प्रहरीले जनाएको छ ।
Discussion about this post