१५ कात्तिक, काठमाडौं । नेपालबाट फलफूल टिप्ने काम गर्न बेलायत गएका कामदारहरुले अवैध शुल्क तिर्नुपरेको सम्बन्धी खोजमूलक समाचारलाई बेलायतको सर्वदलीय सांसद्हरुको एक संस्थाले सन् २०२२ को सर्वोत्कृष्ट खोजमूलक समाचारको सम्मान दिएको छ ।

बेलायतको ‘दि ब्यूरो अफ इन्भेष्टिगेटिभ जर्नालिजम’ र ‘दि गार्डियन’ ले संयुक्त रुपमा खोज गरेको समाचारले उक्त पुरस्कार पाएको हो ।

The best investigative news article dealing with #modernslavery award goes to the @TBIJ& @Guardian for their groundbreaking investigation into the illegal fees migrant workers are charged to work in agriculture in the UK @Mellino@rudrapanghttps://t.co/Ff1vkRYcq8

— HumanTraffickingFdn (@HumanTraffFdn) October 26, 2022

बुधबार बेलायतको ‘हाउस अफ कमन्स’ मा आयोजित एक कार्यक्रममा यो समाचार लेख्ने बेलायतका खोज पत्रकारहरु एमिलियानो मेलिनो, पिट प्याटिशन र नेपाली पत्रकार रुद्र पंगेनीलाई सम्मानित गरिएको हो ।

बेलायतको सबै दलका सांसद्हरुको समूहबाट बनेको संस्था ‘ह्युमन ट्राफिकिङ फाउण्डेशन’ ले हरेक वर्ष गैरदासत्व दिवस (अक्टोबर १८) को अवसरमा ४ विधामा आधुनिक दासत्व (मोडर्न स्लेभरी) अर्थात् मानव तस्करी सम्बन्धी प्रकाशित समाचार, खोजमूलक समाचार, विचार र ब्रोडकाष्ट गरिएको भिडियोलाई सम्मान गर्ने गरेको छ ।