काठमाडौँ। जारी नेपाल प्रिमियर लिग (एनपीएल) अन्तर्गत कीर्तिपुरस्थित त्रिवि क्रिकेट मैदानमा आज (शनिबार) समूह चरणका दुई खेल हुँदैछन्। पहिलो खेल सुदूरपश्चिम रोयल्स र विराटनगर किङ्सबिच बिहान ११ बजे सुरु हुनेछ भने दोस्रो खेल चितवन राईनोज र पोखरा एभेन्जर्सबिच दिउँसो ३ः३० सुरु हुनेछ ।

विराटनगर र सुदूरपश्चिम ‘प्लेअफ’मा पुगिसकेकाले नतिजाले केवल अंक तालिकामा असर पार्नेछ। त्यस्तै, पोखरा र चितवन प्रतियोगिताको समूह चरणबाटै बाहिरिसकेकाले आजको खेल प्रतिष्ठाको लडाइँको रूपमा हेरिएको छ ।

सुदूरपश्चिमसँगै विराटनगर, काठमाडौँ र लुम्बिनीले ‘प्लेअफ’मा स्थान सुरक्षित गरिसकेका छन्।